يسرالعوني – تونس
أحسن وأروع وأفضل عمل فني درامي متكامل هو » حرقة « 
الذي يتناول مأساة حقيقية هي الهجرة غير الشرعية وخيار أكثره مر هو الغرق في أعماق المحيطات أو الوصول للسواحل الإيطالية و السجن و التعرض للتعذيب والترهيب وأشد أنواع الترهيب والتعذيب من الشرطة الإيطالية .
من سخرية الأقدار أن المهاجرين غير الشرعيين فقراء في أوطانهم معذبون و في حالة وصولهم إلى الجنة الموعودة الخيالية المصورة في أذهانهم ؛ يموتون وهم أحياء كل لحظة
غرباء في أشد وأكثر المنافي بشاعة على الأرض في تاريخ الإنسانية 
بلا أدنى شك برافو المخرج المبدع الكبير لسعد الوسلاتي الذي يحمل صفات العالمية في عبقريته الفنية
⚘⚘ وشكرا لكامل فريق العمل ؛ الفنانين ؛ السيناريو الديكور ؛ مدير التصوير ؛ الإضاءة؛ المونتاج وكافة العاملين في رائعة » حرقة » اللي تحمل مقاييس تمنحها مرتبة العالمية من كل نواحي العمل الفني وخصائصه وجماليته 
والحقيقة المنافسة كانت على أشدها بين أهم نجوم الشاشة التونسية و أسماء فنية بارزة في حرقة الذين أبدعوا
واللي ما نخيرو فيهم حتى نجم على آخر بكل موضوعية
مهذب الرميلي ؛ أحمد الحفيان؛ وجيهة الجندوبي؛ شاكرة رماح؛ أميمة المحرزي وكانت هناك مشاركة خاصة كضيفة شرف لسيدة الشاشة التونسية الفنانة الكبيرة القديرة منى نور الدين و للممثل القدير والمخرج والمسرحي والجامعي الأستاذ فتحي العكاري ⚘⚘
« كان يا ماكانش » للمخرج المبدع المتألق عبد الحميد بوشناق ⚘
كان جولة رائعة عبر تاريخ تونس والحضارات التي أنتجتها وصراع حول السلطة والنفوذ بطريقة مختلفة Fantastique فما برشة ضمار humour et comédie بخدمة فينو و مزيانة برشة لأول مرة تصير في تاريخ الدراما التونسية
مع مشاركة لأهم وأغلب كبار نجوم الدراما التونسية » فتحي الهداوي ؛ فاطمة بن سعيدان ؛ البحري الرحالي ؛ سوسن معالج ؛ عزيز الجبالي؛ و عجبتني برشة عودة الثنائي الكوميدي المتميز نور الدين بن عياد و منجي العوني اللي غابوا لسنوات طويلة عن الشاشة .
برافو عبد الحميد بوشناق على ذكاءه الإتصالي و حسه الفني كيفاش نجم يقنع قامات كيما هاذي بالمشاركة في عمل فني كيما » كان ماكانش 2 « ⚘⚘
في الأخير مسلسل » براءة » الموضوع متاعو طرح جدل سياسي حقوقي واسع وهذا موش غريب على الأعمال الفنية والدرامية اللي ينتجها ويخرجها سامي الفهري واللي يحب يخلق بها ضجة كبيرة و تساؤلات إجتماعية عديدة و يصدم بها فئة معينة و يتجه بها إلى جمهور يقعد يبحث علاش جاب المواضيع هاذي .
أنا من الناس اللي مقتنعة أنه الجدال في تعدد الزوجات والزواج العرفي و ضرورة تقديم المهر القانون التونسي والتشريع حسم فيه القرار منذ أكثر من ستين سنة في عهد الزعيم الحبيب بورقيبة ومؤسسي الدولة التونسية الوطنية الحديثة اللي كان من أهم عناصرها بعث مجلة الأحوال الشخصية اللي تنص على أهمية وقدسية حقوق المرأة
في تونس .
لكن للأسف النماذج البشرية هاذي والعلاقات الزوجية الثنائية القائمة على التعدد من أجل اثبات الغريزة الذكورية والزواج بأكثر من إمرأة والتسلط على النساء بحكم المتعة الحميمية والجنسية و يزيد يوظف هذا الرجل الذكر بتعليله بالنص
الديني والقرآن الكريم اللي كان واضح في السياق اللي تم ذكر فيه الآية الكريمة و هناك أسباب نزلت فيها كانت في عصر معين وزمن بعيد كل البعد عن واقعنا الحالي المعاصر في وقت الأنبياء والرسل والصحابة و تم تعليلها لاستشهاد أزواج النساء في الغزوات والحروب و يتزوجن لتتم إعالتهن ماديا ومعنويا في زمن قلة من النساء تشتغلن فيه مع تواجد عدد كبير للأطفال لكثرة إنجاب النساء للأطفال في تلك العصور.
للأسف في الزمن هذا مزلنا نشوفو كل يوم في راجل يتحكم في مرتو إجتماعيا واقتصاديا ويذلها ويهنيها ويفرض عليها الحجاب على خاطر هي قاعدة في الدار وهي بدون أي دخل مادي قار و هذا كان موجود بكثرة خاصة عند برشة نساء توانسة في الخمسينات والستينات من القرن الماضي و لليوم مزال يصير ويحدث للأسف الشديد على خاطر العقلية القديمة قبل اللي تتوارثها الأجيال كانت أنه المرا أهم حاجة تعرس وتاخو راجل وتجيب صغار وتكون ربة بيت أهم من أنه تكمل قرايتها وتتحصل على شهادة جامعية و تتوظف وتكون مرا حرة مستقلة سيدة نفسها تقرر مصيرها بأيديها.
» براءة » يطرح عدة قضايا أهمها أنه المرأة يلزم تكون مستقلة ومعيلة لنفسها حتى وإن كانت ربة بيت ومرا قاعدة في الدار
تتعلم صنعة في يديها كيما الخياطة والتطريز والحجامة تحل الحلو تبيع الحلويات ؛ elle garde les enfants في الدار بالفلوس ؛ تعمل أي حاجة تخليها نوعا ما مستقلة مادية عن زوجها بش نهارت اللي يحب يخونها ولا يصوحب عليها ولا يعرس بمرا أخرى صغيرة مزيانة أصغر منو برشة تجي قد بنتو في العمر يحب يرجع معاها شبابه ويشريها بفلوسو
ما تحيرش المرا تقرر تطلق ولا تقعد معاه وتضحي على خاطر أولادها لكن بكرامتها !
بخدمتها بشهادتها بصنعتها بحرفتها موش تقعد تبكي وتتهان وتتحط تحت صباط راجلها يذلها ويهينها بعدما ضحات بعمرها وصحتها وشبابها وجمالها في سبيل نجاحه المهني وتميز وتفوق أولادها و توصل عمرها في الخمسينات أو الستينات وتحس روحها عطات كل شىء وفلخر ما ربحت شىء لا من الدنيا لا من الراجل لا من الأولاد !
Une femme résignée ; soumise et maltraitée !
مهما كان براءة من حيث إشكاليات تناول المواضيع و المشاكل النفسية والاغتصاب والإرهاب والانتحار وتعدد الزوجات والزواج العرفي والشعوذة والعلاقات الجنسية قبل الزواج و كثرة المصائب والهموم والأحزان والمآسي فيه
ورغم اللي الأحداث ميتة قعدت في أغلب الحلقات
اذ توقفت حول عائلة وناس وزواجه العرفي ثم إغتصاب ابنته المريضة نفسيا مريم و في الأخير علاقة حنين بالابن الأصغر أنيس الذي غرر بها ثم زواجها المفروض عليها بالابن الأكبر طلال .
منذ بداية المسلسل إلى نهايته لم تكن لديه سيرورة ناجحة في تطور وتصاعد الأحداث و الأبطال أخذوا يتخبطون كل في مصيبته و معضلته وأزمته إلى أن وصلنا إلى آخر حلقة فكانت النهاية غير متوقعة ومفتوحة أمام خيارات عديدة لم تحسم وبقيت تخيلات في أذهان المشاهدين.
لكن أهم حاجة في براءة إبداع العظيم فتحي الهداوي أستاذ التمثيل العالمي في دور سي وناس الذي يستحق بجدارة ككل عام جائزة أفضل ممثل تونسي شامل ⚘ و
و الفنانة الكبيرة الرائعة ريم الرياحي التي تميزت في دور الأم زهرة و هي بلا منازع أهم ممثلة في دراما رمضان 2022و هناك مجهود فني واضح من نجلاء بن عبد الله ومحمد علي بن جمعة لكن عزيز الجبالي كان رائعا في دور طلال وعزة السليماني التي فاجأتنا بقوة أدائها التمثيلي الخارق في تقمص شخصية المرأة الشابة الأرملة والمريضة النفسية بسلوكها و تصرفاتها التي تتطور مع الشخصية الضحية من وفاة الزوج إلى الولادة والانتحار مرورا بجريمة اغتصاب جارها عمر وزوج صديقتها المقربة الذي استغل جنونها ووضعيتها المرضية النفسية لممارسة عقده وكبته الجنسي وفي الأخير تم كتمان الجريمة والتستر عليها دون أن ينال جزاؤه من العقاب القانوني.